Icarə münasibətlərinin yaşı 4000 ilə yaxındır. İcarə haqqında müqavilələr ilk dəfə qədim Şumer şəhəri Urda e.ə. 2000-ci ildə saxsı material üzərində yazılmışlar. Qədim şumerlər asasən kənd təsərrüfatı avadanlığı, xüsusilə də kotanı icarəyə götürmüşlər. Finikiyalılar isə heyətləri ilə birgə gəmilərin icarəsini təşkil etmişlər. Orta Əsrlər dövründə hərbi zadəganlar üçün yaraq-əsləhələrin (qalxan, hərbi geyim və s.) icarəsi geniş yayılmışdır. Məlumatlara əsasən, “lizinq” termini ilk dəfə olaraq 1877-ci ildə istifadə edilmişdir. “Bell” telefon şirkəti öz telefon aparatlarının satışını onların icarəsi ilə əvəz etmək qərarına gəlmişdir. Bu da icarə münasibətlərinin inkişafına yeni bir təkan olmuşdur.